Mei Haametsdorf

Waiß leucht derr Kerchtorm wait enns Feld
Unn groh vermohst sei schiwwern Dach.
Nah eß deß Dorf drimmrimm geschdällt
Medd schworz Gebälk unn waiß Gefach.

Unn aus d`m Groine guckt manch Haus
Wäj Hinkelcher dorch Gluckeflihl.
Su läiblich säit däß alles aus,
`ß eß unn blaibt mei Wannerzihl!

Unn noh derr Wihs zou `n Blankezau
Vuh ahl Gelärch, verknohrzt unn groh,
Droff hingke ärdern Debb e brau
Unn ahch geplackte Bukse bloh.

Uhm Wisseborn, wuhs Grohs naut dahgt
Do flattchert waiß de Wäsch emm Wend.
E Hond der gauzt. Deß Backes rahcht.
E Gickel kräht unn `ß sengt e Kend.

Unn kromm lähft mancher Wehk enns Feld
Uh Hecke unn uh Beem vorbaj ...
Su lait se do, mei Haametwelt!
Blaib schdih, mei Boub, unn guck ... unn schwaj ... !